تربت میں بلوچستان اسپیشل ڈویلپمنٹ انیشییٹو (BSDI) کے تحت قائم جدید آئی ٹی ہب کا آئی جی ایف سی بلوچستان (ساؤتھ) نے باقاعدہ افتتاح کیا۔ تقریب میں سول انتظامیہ، مقامی عمائدین اور مختلف شعبہ ہائے زندگی سے تعلق رکھنے والے افراد نے شرکت کی۔ آئی ٹی ہب کے قیام کا مقصد ضلع کیچ کے نوجوانوں کو جدید ڈیجیٹل تعلیم، پیشہ ورانہ مہارتوں اور جدید ٹیکنالوجی پر مبنی معیاری تعلیمی ماحول فراہم کرنا ہے۔
اس جدید ہب میں اسٹیٹ آف دی آرٹ آئی ٹی ہال، ڈیجیٹل لائبریری، کانفرنس روم، فری لانسرز ہب، تفریحی مرکز، پرنسپل آفس اور اسٹاف روم قائم کیے گئے ہیں۔ آئی ٹی ہال میں 50 جدید کمپیوٹر سسٹمز، 75 انچ اسمارٹ ڈسپلے، تیز رفتار انٹرنیٹ، لوکل ایریا نیٹ ورک (LAN)، انسٹرکٹر اسٹیشن، ساؤنڈ سسٹم اور جدید سرویلنس سسٹم نصب کیا گیا ہے۔ ڈیجیٹل لائبریری میں جدید ورک اسٹیشنز، کتابوں اور ای بکس کا ذخیرہ اور اسمارٹ ایل ای ڈی ڈسپلے موجود ہے، جبکہ کانفرنس روم اور فری لانسرز ہب میں ای کامرس اور فری لانسنگ کے لیے جدید کمپیوٹرز، خصوصی ورک اسٹیشنز اور کانفرنس کی سہولیات فراہم کی گئی ہیں۔ تفریحی مرکز میں انڈور کھیلوں کی سہولیات، اسمارٹ ڈیجیٹل ڈسپلے اور کیفے ٹیریا موجود ہے۔
آئی ٹی ہب میں 20 کے وی اے کا سولر پاور سسٹم بیک اَپ کے ساتھ نصب کیا گیا ہے، جو بلا تعطل بجلی کی فراہمی یقینی بناتا ہے، جبکہ تعلیمی ماحول کو خوشگوار بنانے کے لیے 10 جدید ایئر کنڈیشنرز بھی نصب کیے گئے ہیں۔
آئی ٹی ہب ہر بیچ میں 50 طلبہ کو تربیت فراہم کرنے کی صلاحیت رکھتا ہے اور سالانہ چار پیشہ ورانہ کورسز کرائے جائیں گے۔ تجربہ کار آئی ٹی ماہرین طلبہ کو عملی اور جدید تقاضوں کے مطابق تربیت فراہم کریں گے، اگست کے پہلے ہفتے سے شروع ہونے والے پہلے بیچ کے لیے رجسٹریشن کا آغاز ہو چکا ہے۔ آئی ٹی ہب تربت بلوچستان کے نوجوانوں کے لیے جدید ڈیجیٹل مہارتوں، اعتماد اور بہتر مستقبل کی جانب ایک اہم قدم ثابت ہوگا۔
Leave a Reply