صوبائی بجٹ کی تیاری میں مختلف علاقوں کے مسائل اور عوامی ضروریات کو مدنظر رکھا گیا ہے، نوابزادہ امیر حمزہ خان زہری

کوئٹہ : 18 جون 2026ء

صوبائی مشیر بلدیات و دیہی ترقی نوابزادہ امیر حمزہ خان زہری سے پاکستان پیپلز پارٹی کے رہنماء عبدالباقی مردانزئی کی قیادت میں ژوب ڈویژن، قلعہ سیف اللہ اور شیرانی سے تعلق رکھنے والے پارٹی وفد نے ملاقات کی۔ ملاقات میں سیاسی، علاقائی اور پارٹی امور سمیت تنظیمی فعالیت پر تفصیلی تبادلہ خیال کیا گیا اس موقع پر عبدالباقی مردانزئی نے صوبائی مشیر نوابزادہ امیر حمزہ خان زہری کو پارٹی کارکنوں کو درپیش مسائل اور مشکلات سے آگاہ کیا۔ نوابزادہ امیر حمزہ خان زہری نے وفد سے گفتگو کرتے ہوئے کہا کہ پاکستان پیپلز پارٹی بلوچستان کے تمام علاقوں میں موجود کارکنوں کو تنہا نہیں چھوڑے گی۔ انہوں نے کہا کہ پارٹی کارکن ریڑھ کی ہڈی کی حیثیت رکھتے ہیں اور انہی کی محنت اور قربانیوں کی بدولت آج پیپلز پارٹی مزید مضبوط ہو رہی ہے انہوں نے کہا کہ بلوچستان کے دور دراز علاقوں میں موجود کارکنوں کے مسائل کے حل کے لیے عملی اقدامات کیے جائیں گے۔ نوابزادہ امیر حمزہ خان زہری کا کہنا تھا کہ صوبائی بجٹ کی تیاری میں مختلف علاقوں کے مسائل اور عوامی ضروریات کو مدنظر رکھا گیا ہے، جس کے مثبت نتائج جلد سامنے آئیں گے۔ انہوں نے امید ظاہر کی کہ ترقیاتی منصوبوں اور عوامی فلاحی اقدامات کے ذریعے بلوچستان ترقی کی نئی منازل طے کرے گا۔