کوہلو کی انتظامی حدود میں رد و بدل پر تحفظات، فیصلے پر نظرثانی کی جائے: عبدالشکور مری

کوئٹہ (ویب ڈیسک) پاکستان مسلم لیگ کے مرکزی ڈپٹی سیکرٹری اطلاعات عبدالشکور مری نے ضلع کوہلو کی انتظامی حدود میں حالیہ رد و بدل پر شدید تشویش کا اظہار کرتے ہوئے کہا ہے کہ اس فیصلے سے دور دراز کے علاقوں کے عوام کو مشکلات کا سامنا کرنا پڑے گا۔
اپنے جاری کردہ بیان میں انہوں نے کہا کہ اگر ضلع کوہلو کی آبادی میں اضافے کی ضرورت تھی تو چماولنگ کے مکمل علاقے کو ضلع میں شامل کیا جاتا، لیکن اس کے برعکس دور افتادہ علاقوں کو شامل کرنے کا فیصلہ کیا گیا، جس سے عوامی مسائل میں اضافہ ہوگا۔
عبدالشکور مری نے کہا کہ انتظامی فیصلے عوامی سہولت، جغرافیائی حقائق اور مقامی ضروریات کو مدنظر رکھ کر کیے جانے چاہئیں، نہ کہ کسی بد نیتی یا مخصوص مقاصد کے تحت۔ انہوں نے خدشہ ظاہر کیا کہ موجودہ فیصلے کے نتیجے میں عوام کو سرکاری خدمات، انتظامی امور اور سفری مشکلات کا سامنا کرنا پڑے گا۔
انہوں نے حکومت بلوچستان سے مطالبہ کیا کہ کوہلو کی انتظامی حدود میں کی گئی تبدیلیوں پر فوری نظرثانی کی جائے، متعلقہ علاقوں کے عوام اور منتخب نمائندوں کو اعتماد میں لیا جائے اور ایسا فیصلہ کیا جائے جو عوامی مفاد اور انتظامی سہولت کے مطابق ہو۔