بجلی سے متعلق عوامی مسائل کے حل کے لیے صوبائی مشیر بلدیات کی کیسکو چیف سے ملاقات

صوبائی مشیر نوابزادہ امیر حمزہ زہری نے متعلقہ علاقوں کے مسائل کے حل کے لیے سنجیدہ اور مؤثر اقدامات کرنے پر زور

کوئٹہ : (11 جون 2026ء)

صوبائی مشیر بلدیات و دیہی ترقی نوابزادہ امیر حمزہ خان زہری نے چیف ایگزیکٹو آفیسر کیسکو انجینئر یوسف شاہ خان سے ان کے دفتر میں ملاقات کی۔ ملاقات کے دوران ضلع زہری، خضدار، قلات اور بالخصوص چیف آف جھالاوان نواب ثناء اللہ خان زہری کے حلقہ انتخاب میں بجلی کی اضافی لوڈشیڈنگ، زمینداروں کو درپیش مشکلات اور مختلف علاقوں میں بجلی کی تاریں چوری ہونے کے باعث بجلی کی عدم فراہمی جیسے مسائل پر تفصیلی تبادلہ خیال کیا گیا اس موقع پر نوابزادہ امیر حمزہ زہری نے متعلقہ علاقوں کے مسائل کے حل کے لیے سنجیدہ اور مؤثر اقدامات کرنے پر زور دیا۔ چیف ایگزیکٹو آفیسر کیسکو انجینئر یوسف شاہ خان نے مسائل کے جلد حل اور بجلی کی فراہمی بہتر بنانے کے لیے ہر ممکن اقدامات کی یقین دہانی کرائی صوبائی مشیر بلدیات نوابزادہ امیر حمزہ زہری نے کہا کہ عوامی مسائل کے حل کے لیے تمام اداروں کو باہمی تعاون اور مشترکہ کاوشوں سے کام کرنا ہوگا۔ انہوں نے کہا کہ جھالاوان اور خصوصاً چیف آف جھالاوان نواب ثناء اللہ خان زہری کے حلقہ انتخاب کو درپیش مسائل کے حل اور بجلی کی بہتر فراہمی کے لیے اہلِ علاقہ ہر ممکن تعاون کریں گے۔ صوبائی مشیر نوابزادہ امیر حمزہ زہری نے عوامی مسائل کے حل کے لیے کیسکو کی جانب سے کیے جانے والے اقدامات کو سراہتے ہوئے مزید عملی اقدامات کی ضرورت پر بھی زور دیا۔