سریاب کو آخر کس جرم کی سزا دی جا رہی ہے؟

سریاب میں گیس کی بندش، پانی کا بحران، بجلی کی عدم دستیابی، اسٹریٹ کرائم اور دیگر بنیادی مسائل آخر صرف سریاب ہی میں کیوں ہیں؟ پانچ دن سے عوام گیس سے محروم ہیں، مہنگائی کے اس دور میں جہاں اشیائے خوردونوش کی قیمتیں آسمان سے باتیں کر رہی ہیں، ایک غریب آدمی کے لیے زندگی گزارنا پہلے ہی مشکل ہے، ایسے میں گیس کی بندش نے عوام کی مشکلات مزید بڑھا دی ہیں۔
سوال یہ ہے کہ کیا سریاب کے عوام کو اس لیے سزا دی جا رہی ہے کہ یہاں بلوچ عوام کی اکثریت آباد ہے؟ نہ ہمیں گیس میسر ہے، نہ پینے کا صاف پانی، نہ بجلی کی مناسب سہولت اور نہ ہی عوام اپنے جان و مال کے حوالے سے خود کو محفوظ سمجھتے ہیں۔ آخر سریاب کے عوام کب تک ان بنیادی مسائل کا سامنا کرتے رہیں گے؟
دوسری جانب فارم 47 کے ذریعے سریاب کے عوام پر مسلط کیے گئے ایم پی ایز اور ایم این ایز سے بھی سوال ہے کہ وہ سریاب کے عوام کے مسائل کے حل کے لیے کہاں کھڑے ہیں؟ عوامی نمائندوں کو اپنے حلقے کے مسائل اور عوام کی مشکلات میں عملی دلچسپی لینی چاہیے، مگر افسوس کہ سریاب کے عوام آج بھی بنیادی سہولیات سے محروم ہیں۔
سریاب کے عوام کسی خیرات کے طلبگار نہیں، وہ اپنے بنیادی حقوق کا مطالبہ کر رہے ہیں۔
سردار احمد خان شاہوانی نے فیصلہ کیا ہے کہ سریاب کے اجتماعی مسائل کے حل کے لیے جلد از جلد آل پارٹیز کانفرنس بلائی جائے گی، جس میں تمام سیاسی جماعتوں، سیاسی و سماجی رہنماؤں سے مشاورت کرکے آئندہ کا لائحہ عمل طے کیا جائے گا۔
اگر سریاب کے عوام کے بنیادی مسائل کو فوری طور پر حل نہ کیا گیا تو عوام اپنے حقوق کے لیے جمہوری اور آئینی طریقے سے آواز بلند کرنے پر مجبور ہوں گے۔
اب سریاب کے عوام خاموش نہیں بیٹھیں گے۔ اپنے حقوق کے لیے اجتماعی جدوجہد جاری رکھیں گے۔
— سردار احمد خان شاہوانی
حقیقی عوامی منتخب نمائندہ، ایم پی اے پی بی 46