بلوچستان پرنٹ میڈیا پالیسی کا معاملہ ہر فورم پر اٹھائیں گے، کلثوم نیاز بلوچ

ڈاکٹر ناشناس لہڑی و دیگر کا ملاقات، پرنٹ میڈیا کے مسائل کے حل اور مشترکہ کوششیں جاری رکھنے پر اتفاق

کوۂٹہ (ویب ڈیسک ) نیشنل پارٹی کی رکن صوبائی اسمبلی کلثوم نیاز بلوچ سے ڈاکٹر ناشناس لہڑی و دیگر مدیران نے ملاقات کی۔ ملاقات میں بلوچستان پرنٹ میڈیا پالیسی کے حوالے سے تفصیلی گفتگو کی گئی۔ اس موقع پر بلوچستان کے پرنٹ میڈیا کو درپیش صورتحال اور پالیسی سے متعلق مختلف نکات پیش کیے گئے۔ کلثوم نیاز بلوچ نے کہا کہ بلوچستان پرنٹ میڈیا پالیسی ایک اہم مسئلہ ہے جس کا تعلق صوبے کے صحافتی اداروں اور میڈیا کے مستقبل سے ہے۔ انہوں نے یقین دہانی کرائی کہ اس معاملے کو ہر فورم پر بھرپور انداز میں اٹھایا جائے گا اور اس کے حل کے لیے ہر ممکن کوشش کی جائے گی۔ انہوں نے کہا کہ متعلقہ حلقوں کی مشاورت سے ایسی پالیسی کی حمایت کی جائے گی جو بلوچستان کے پرنٹ میڈیا کے مفادات اور ضروریات سے ہم آہنگ ہو۔ ملاقات خوشگوار ماحول میں ہوئی جس میں بلوچستان پرنٹ میڈیا پالیسی سے متعلق رابطوں اور مشاورت کے عمل کو مزید مؤثر بنانے اور اس مسئلے کے حل کے لیے مشترکہ کوششیں جاری رکھنے پر اتفاق کیا گیا۔ اس دوران بلوچ سٹوڈنٹس آرگنائزیشن پجار کے مرکزی وائس چیئرمین ڈاکٹر طارق بلوچ بھی موجود تھے۔