وزیر اعلیٰ میر سرفراز بگٹی کے ہنہ اوڑک دھرنا کمیٹی سے کامیاب مذاکرات، دھرنا ختم کرنے کا اعلان

کوئٹہ ( ویب ڈیسک ) کوئٹہ کے علاقے بی اے مال کے قریب جاری دھرنے میں اہم پیش رفت، جہاں وزیر اعلیٰ بلوچستان سرفراز بگٹی دھرنا کمیٹی اور شہداء کے لواحقین سے ملاقات کے لیے پہنچے۔ ان کے ہمراہ وزیر صحت بخت محمد کاکڑ، سینیٹر منظور کاکڑ اور کمشنر کوئٹہ شاہ زیب کاکڑ بھی موجود تھے۔

طویل مذاکرات کے بعد دھرنا کمیٹی اور لواحقین نے وزیر اعلیٰ کی درخواست پر دھرنا ختم کرنے کا اعلان کر دیا۔
اس موقع پر وزیر اعلیٰ سرفراز بگٹی نے کہا کہ وہ پہلے دن سے دھرنا کمیٹی کے ساتھ رابطے میں تھے اور مسئلے کے پرامن حل کے لیے سنجیدہ کوششیں جاری رکھے ہوئے تھے۔ انہوں نے کہا کہ ان کا تعلق عوام اور ان کے بزرگوں سے ہمیشہ قائم رہا ہے اور آئندہ بھی برقرار رہے گا۔

وزیر اعلیٰ نے کہا کہ وہ ہمیشہ اپنی عوام کے شانہ بشانہ کھڑے رہے ہیں اور آئندہ بھی رہیں گے۔ انہوں نے اس بات کا اعادہ کیا کہ اگر حکومت سے کوئی غلطی ہوئی ہے تو اسے تسلیم کیا جائے گا اور اس کا ازالہ بھی کیا جائے گا۔